Politiks

My public. How far? Una go don dey wonder say wey una guy. Well na me dis. The tin wey happen be sey, as I dey for annual leave for work na im I say make I kukuma take time out for writing.

For dis few days wey I take dey res, na im I begin to tink again. I come dey tink am sey next year na election year for Naija. Una know wetin dat one mean? E mean say anoder time don come for the sharing of the national cake. Na sidon look una dey look. Unu Naija pikin for diaspora una no go run go chop national cake? Abi na look una dey look?

Some people don tell me say dat next year dem go participate fully for the election. Well, more grease to their elbow. As long as say no be presidency dem dey go for. Any man pikin wey one try OBJ for dat next year, make e don first write im will. As i see na i go die put na im OBJ dey. You know say the man been be military man, e no dey take nonsense. Just look the way im nose set you go get the picture.

Me nko? Ahh!!! Una dey look for who una go kill. Me na from afar na im i dey involve mysef for the election. Na to dey run commentary na im i dey but partisan politics? no be me and una.

I don look democracy (demonstration of craze) for Naija i come compare am with the one for UK i come arrive at the conclusion say our own variety of democracy na the crude version. I dey watch Prime Minister's question time (na where the members of the house fit ask the Prime minister questions wey get to do with the gofment im policies etc) na im make me say our own version e crude. If you see how dem dey fire Tony Blair question. I come imagine make OBJ den appear the house for questioning, na fight ooh! Abi una no hear when e tell dem for dat bomb blast for my backyard for Onigbongbo say, is it because i came here i am not suppose to be here. Abi na the time wey e tell one CAN (Christian Association of Nigeria) member say, you must be an idiot. The man fit reply am? Dem no born am well. Any attempt to reply OBJ, e no for see sunlight for the next two years.

Me i support say our democracy must reflect our own Naija values and as such go different small from the kind democracy for America, England and the rest of the world. But, at least e most get certain characteristics wey go show say na democracy. Na democracy we get now for Naija? I don't tink so! E remain small. As dey say yo bale yo bale ni labalaba fin wo 'gbo.

My people time don reach to say au revoir.