The story so far...

Men, una no go vex oh! I seem to be saying that quite a lot these days. Anyhow, the tin be say na ignorance na im make una bro nefer attend to dis blog. Wetin happen be say because i get gmail e com wan tie am to my blogspot so therefore your guy com confuse. Anytime wey i try log in, e go say make i build new blog page. Fa fa fa fowl! Build gini...dem no know say na manage i take dey write dis one. many many tins don happen since i last write. Na where i go start now, abeg make una help me. Na for the rambos wey dey wear socks over their head say na balaclava abi na for the so called election wey dem do for Naija. Abeg make una leave all those ones, dem be old gist.

But wait first oh, i been tink say na hungry na im dey do those boys on balaclava. But e be like say since EFCC don kolobi dem 419 dis na the next money making scheme. Una tink say na so dem dey release those people. Dat na why dem say na hostage taking. When dem kidnap the person the next tin na for dem to settle the kidnappers. Una no hear the gist wey dem kidnap dis group of oyinbo dem, dem com send out signal to the company dem say "oya oh, make una com claim una people and pay the ramsom". Dem don claim all the people so tey e remain one. Na im dem ask the man say which kind oyinbo you com be sef wey dem no wan claim you. Na im e answer dem say "bros na una no let me talk, me i be wafi boy"...

What of the small girl wey dem kidnap, una no hear wen naija media label am as british toddler. If to sey dem say the pikin na genius you for don hear dem say na naija born. Abi na only me see am? Pikin wey im mama na naija, abi una no hear the name, Oluchi, baba oruko! How many footballers wey one or both parents be naija wey no send naija wey dem dey hail as "Nigerian born". Ignoramus, make dem wake up and smell the gutter.

Wen you look all dis matter up and down you go realise say we get a long way to go. The contracts wey dem dey give for those oil producing regions run into billions of naira but the money no dey ever reach the people demselves. For me oh, no be only gofment dem suppose dey fight but na dem broders wey suppose dey look after dem interest but dey kolobi the money for dem selves. Dis na the time for efrebody to change dem style.

Wetin dey happen?

Wetin dey oh!

My peeple i travel make una no vex. Where i travel go? As una kno dem get difren difren kind travel. Dem get air travel, rail travel, astral travel, spiritual travel, undergee travel and many many more. Na de undergee one na im i do. E remain small i for lost patapata for undergee, we tank the lord.

Election time don reach again oh! Naija own brand of political campaign don start. Na im be say many many peeple go dey a limb or two less by de end of de election. Naija own campaign no be thru media oh! Na to hack down any opposition. Dem campaign expenses go look somtin like dis

• 10% for media
• 30% to bribe officials
• 10% for campaign tshirts, banners etc
• 50% fund to eliminate opponents

If you dey contest against person wey holo wad pass you, you don already lose be dat. Not only sey you go lose de election but also de money wey you don invest. And if you no careful you go lose you life join am.

Anyway na dem sabi! Na wen person don chop beleful na im dem go com decide say time don reach to die. Na dat time dem go sign dem death warrant by going into politics.

Person wey get ear make him hear, it ain't worth it! Contribute to de development of ya contry but no let greed make you wan be politician.

A yin gana fun!